撰/陳玉珠

阿媽共我講：
圓環有鬼，
毋通去遐𨑨迌——
噓⋯⋯毋通講⋯⋯

圓環，是一个好耍的所在，
每一工日頭出來的時，
噹，噹，噹，噹，
圓環中央的放送頭會出聲，
親像一陣金色的鳥仔，
啁啁啁啁共我的靈魂鈎去，
我徛定定予心內的鳥仔綴咧飛，
聽一句：「 下面一響：中原標準時間：八點整。」

鬼佇佗位？
我真搞怪，故意行入圓環，
我足好玄，欲看鬼生做按怎。

阿娘共我警告：
圓環有鬼，
會共囡仔掠去，
毋通去遐耍——
噓⋯⋯毋通講⋯

日頭當炎的時，
圓環內的大樹上唌我，
有大大片的樹影，
有厚話的樹葉仔共我擛手，
沙沙沙沙，敢是鬼仔咧講啥物？
圓周有四座彎彎的水池，
清涼的水草搖搖晃晃，
我真愛佮怹握手。

阿姐共我偷講：
圓環有鬼，
我毋敢去看，
足恐怖——
噓⋯⋯毋通講⋯⋯

阿兄共我偷講：
圓環有鬼，
我有去看，
槍聲乓乓，血噴出來，
我緊走返來，吐甲規面青恂恂，
阿媽𤆬我去予三媽收驚——
噓⋯⋯毋通講⋯⋯

圓環有鬼，
佇我出世前就有鬼矣，
我一定欲揣出來，
為啥物圓環有鬼。

1947年，新營火車站前，
二條大通交接的大圓環，
南來北往重要的交通要道，
日治時期的行政、商業中心。
1947年，二次世界大戰結束，
日本無條件投降，退出台灣，
中國國民黨暫管，進入台灣，
就遐爾單純的交換，
台灣煞對天堂掉落地獄——
二二八事件！

噓⋯⋯毋通講⋯⋯
噓⋯⋯毋通講⋯⋯
噓⋯⋯毋通講⋯⋯
噓⋯⋯毋通講⋯⋯
掩蓋數十年以後，
五0年代出世的囡仔才有通了解的
恐怖世紀，
外省兵仔攑槍，毋免理由：
「老子斃了你！乓乓！」
台灣人衰啊！
無代無誌死佇槍下。

咱無愛白白送命！
台灣青年團結起來，
對抗土匪，
雖然滿腹義氣，總是人少欠武器，
親像提雞卵擲鐵壁，
猶原死路一條⋯⋯
為著避免無謂的犧牲，
慈悲醫師出面佮土匪兵交涉，
青年團交出武器予公所保管，
兵仔莫閣開槍，保障逐家平安。

朴子醫師黃媽典，
人人敬重的好醫生，
日本總督府醫學校畢業，
預防鼠疫傳播有功勞，
伊做朴子街街長，
伊做台南州協議員，
伊做台灣總督府評議員，
伊有名望，有正義感，
伊有保護青年性命的使命感，
時勢造成，台灣人必需再次承受外來政權，
出面協調，伊欲擔起所有的責任。

圓環有鬼？
啊，原來就是醫師黃媽典。
遮爾好的人，為何會來變做鬼？

槍枝全部交入公所鎖起來，
台灣青年只有肉身，
講話無算話是中國土匪的本性，
繼續欲掠人，
先生叫青年逐家
緊走、緊走、緊走、緊！走！

代誌敢毋是結束矣？
暴亂首要分子——黃媽典
這是伊的新身分，
七跤八手掠起來，
䊺䊺捆綁車去高雄關起來，
恐怖酷刑一項一項伺候，
儒雅的醫師難以相信
對方敢是人？
比野獸閣較野蠻⋯⋯

一个月刑求，規身無一塊好，
閣較高明的醫術，無法度救家己，
衰！
暴亂首要分子——黃媽典！
衰！
無予伊任何辯護的機會！
衰！
無任何審判⋯⋯
衰！
3月22日，押返來新營，
暴亂首謀，必須消滅！
魔鬼驚啥物？
乓！
乓！乓！

阿兄講伊有看著
鬼！
血對伊身軀迸出去⋯⋯

我大漢矣，圓環已經變身，
樹仔無去矣，
水池無去矣，
放送塔無去矣，
神秘的圓環，四面通光。

我大漢矣，阿媽共我講：
圓環有鬼喔！
是阮彼个時代的大好人。
可憐的鬼⋯⋯
阿媽目屎潺潺流⋯⋯

—————————————————————————————————————————————–

陳玉珠

台南新營人，1950年出生，創作超過百篇童話，亦有少年小說、詞曲、童詩歌謠、台文小說、囡仔詩歌、繪本等，曾任南瀛之美圖畫書的總編輯，多次獲得洪建全兒童文學奬、教育部、教育廳、高雄文學奬、台南文學奬，近年著重台文畫寫人權故事。